“Top Fest 8” ka kurorëzuar që në minutat e para Artistin e Ri më të Mirë. Këtë çmim që i ka shkuar këngëtares kosovare, Anxhelina Hadërgjonaj, vajza e këngëtares Albërie Hadërgjonaj, e ka dorëzuar Lori Hoxha në emër të Fondacionit Mediatik “Dritan Hoxha”. “Diçka që kujtoj shumë mirë nga babi im, që ju e njihni si Tani i ‘Topit” ishte dëshira e tij për të mbështetur të rinjtë. Edhe ai i ri, guxoi të punonte me një grup të rinjsh, i besoi ata dhe krijuan median gjigante që është sot ‘Top Media’. Në emër të Fondacionit ‘Dritan Hoxha’ që ka në qëllimet e tij mbështetjen e artistëve të rinj, Çmimi i Artistit të Ri më të Mirë i shkon Anxhelina Hadërgjonajt”, ka thënë Lori Hoxha, teksa këngëtarja e re kosovare mes shumë emocioneve ka kujtuar Presidentin e ndjerë të “Top Media”, i cili me punën e tij mundësoi që shumë artistë, veçanërisht ata të rinj të promovohen në skenën shqiptare.